كورگەن ادامعا, كەلگەن ادامعا اۋقىمى كەڭ, ەكى كۇندىك فەستيۆال ۋاقىتتى كەرى اينالدىرىپ, وتكەن تاريحقا ساياحات جاساتپاق.
بۇل فەستيۆالدە قاز-قاتار تىگىلگەن ون ەكى قاناتتى اقشاڭقان 60 ءۇي تىگىلىپ, كوشپەندىلەر شەرۋى سالتانات قۇرادى. 10 مەملەكەتتەن كەلگەن ات قۇلاعىندا وينايتىن شاباندوزدار ونەردىڭ سان ءتۇرىن كورسەتەدى. ەڭ ۇزدىك ەتنومۋزىكانتتار دالانى دۇبىرلەتىپ, كوكپار تارتىلادى. وعان قوسا اۋدارىسپاق, قىز قۋ, اساۋعا تۇساۋ سالۋ ويىندارى وتەدى.
قولونەر شەبەرلەرى مەن ۇستالار ىسمەرلىگىن پاش ەتسە, بالالار الاڭى, التىباقان, كۇي تارتىس كەلگەندەردىڭ كوڭىلىن كوتەرەدى. قىران قۇس پەن قۇماي-تازى سىندى بابادان قالعان مۇرانىڭ بارلىعى وسى تويدان تابىلماق. تۇنگى الاۋ باسىنداعى ويىندار دا جاستاردى قىزىقتىرا تۇسەرى ءسوزسىز.
ۇيىمداستىرۋشىلاردىڭ ايتۋىنشا, كورەرمەندەر اراسىنان «ەڭ ادەمى ۇلتتىق كيىم» تاڭدالىپ, ءتۇرلى ۇلتتىق ويىندار وينالىپ, سان-الۋان سايىستار ۇيىمداستىرىلادى.
سونداق-اق, تاقىرىپتىق سەكتورلار جۇمىس ىستەيدى. ماسەلەن, «المالى» اتتى قولونەرشىلەر اۋىلىندا شەبەرلىك ساباقتارى وتكىزىلەدى. كورەرمەندەر تەك تاماشالاپ قانا قويماي, ماماننىڭ كومەگىمەن سازدان قۇمىرا جاساپ كورەدى. ال «شابىت» مۋزىكانتتار اۋىلىندا بايقاۋ وتەدى. كورەرمەندەر ءتۇرلى اسپاپتاردا ويناپ, باقتارىن سىنايدى, ۇلتتىق تاعامداردان ءدام تاتىپ, جاساۋ قۇپياسىمەن تانىسادى. كاسىبي بۇركىتشىلەر مەن پالۋانداردىڭ ونەرىن تاماشالايدى. وسىلايشا, كەلگەن كورەرمەندەر, مەيماندار كوشپەندىلەر ءومىرىن ءوز كوزدەرىمەن كورىپ, تۇرمىسىمەن تانىسادى. سونداي-اق, كورەرمەندەر اراسىنان «ەڭ ادەمى ۇلتتىق كيىم» تاڭدالىپ, سىيلىق بەرىلمەك.
ايناش ەسالي, «ەگەمەن قازاقستان»